Viðmið varðandi not og slit á ökutækjum í langtímaleigu

Hér eru tilgreind þau viðmið sem eru notuð við mat á því sem telst eðlilegt og ekki eðlilegt varðandi ástand ökutækja þegar þeim er skilað að leigutíma loknum. Mat er ávallt háð aldri ökutækja og akstursnotkun í samræmi við samninga.

Við matið er ávallt reynt að meta ástand ökutækja með sanngjörnum hætti og leitast við að lagfæra hluti frekar en að endurnýja þá.

Ástandsskoðun ökutækja við lok samningstíma fer fram hjá Hertz eða hjá aðila sem Hertz útnefnir. Ökutæki fara í gegnum staðlaða ástandsskoðun og heildarástand ökutækis metið. Við ástandsskoðun er gert matsyfirlit þar sem tilgreindar eru niðurstöður s.s. tjón, gallar og það sem vantar miðað við upprunalega lýsingu á ökutæki.

Ökutækinu þarf að skila með öllum þeim hlutum sem fylgdu því við afhendingu — þar á meðal lyklum, mottum og lausum aukahlutum. Brotin eða sprungin rúða, speglar eða stuðarar teljast einnig ekki í lagi.

Hér fyrir neðan má sjá dæmi og myndir sem sýna hvað telst eðlilegt slit á bíl og hvað telst ekki vera í lagi. Reglurnar um mat á ástandi bíla að samningstíma loknum eru unnar í samráði við fagaðila og veita skýra mynd af því hvaða ástand telst ásættanlegt.

Leigutakar bera ábyrgð á að kynna sér þessar reglur og tryggja að allir sem nota bílinn séu meðvitaðir um þær.

Þegar bílnum er skilað fer matsaðili yfir ástand hans. Ef skemmdir eða tjón finnast sem ekki teljast til eðlilegs slits, er útbúið matsyfirlit. Þar kemur fram hvaða atriði þarf að lagfæra og hver áætlaður kostnaður er.

Allir hlutir sem fylgdu bíl við upphaf samnings eiga að fylgja við skil á honum. Helstu atriði eru t.d:

Allir lyklar
Þjónustu- og smurbók
Hleðslusnúrur
Farangurshlíf (í skotti) og mottur
Þverbogar, skíða- og hjólafestingar
Varadekk
Verkfæri til hjólbarðaskipta eða viðgerða
Öryggisbúnaður s.s. þríhyrningur og sjúkrakassi

Eftirfarandi reglur gilda við skil á bílum úr leigu hjá Hertz

Lakk

Í lagi

Fá og lítil svæði þar sem steinkast hefur rispað lakkið, litið er til aldurs og akstursnotkunar í þessu samhengi.

Grunnar rispur og skemmdir sem hægt er að lagfæra með mössun eða bóni.

Hér er lítið svæði þar sem hoggið er upp úr lakkinu. Hér er mögulegt að koma í veg fyrir frekari skemmdir með því að mála í lakkið áður en ryð byrjar að myndast. Þetta telst í lagi ef hægt er að grípa inn í tímanlega með notkun réttra efna við lagfæringu.

Lakkaðir stuðarar með grunnum rispum sem hafa ekki farið í gegnum lakkið.

Stuðarar sem ekki eru lakkaðir með grunnar rispur teljast í lagi, einnig litlar dældir allt að 20 mm í þvermál.

Rispur á hliðarspeglum, ekki stærri en 50 mm, á ómáluðum speglum. Á lökkuðum speglum má rispan ekki hafa náð niður í ál eða grunnefni spegilsins. Spegillinn þarf að vera að öllu leyti óbrotinn og hæfur til notkunar.

Nauðsynlegt er að ljós og annar búnaður sem festur hefur verið á ökutækið sé að öllu leyti hæfur til notkunar. Eins ef slíkur búnaður hefur verið fjarlægður í lok leigutíma, að gengið hafi verið frá eftir festingar þannig að ekki sjái á.

Ekki í lagi

Óeðlilega mikið magn steinhögga í lakkinu. Höggin hafa farið í gegnum lakkið og/eða ryð byrjað að myndast. Hér er þó litið til aldurs ökutækis og fjölda ekinna kílómetra.

Högg, dældir, beyglur og rispur með skemmdum á lakki og eru byrjuð að sýna merki um skemmdir.

Rispur eða skemmdir sem ná í gegnum lakkið eru ekki í lagi. Ryðskemmdir eru ekki í lagi. Steinkast má ekki að hafa hoggið úr lakkinu.

Brotið eða sprungið grill eða merki telst ekki í lagi.

Stórar rispur, dældir eða skemmdir sem ná yfir 20 mm í þvermál.

Umtalsvert tjón á speglum þar sem rispur eru það miklar að þær ná niður í gegnum lakk.

Miklar skemmdir á spegli og hann skakkur. Einnig þarf ljósbúnaður sem festur hefur verið á ökutækið að vera á sínum stað og án skemmda.

Framhluti / stuðarar

Í lagi

Í mesta lagi tvær litlar skemmdir á stuðara.

Smávægileg litabreyting á stuðara, svo sem eins og eftir veðrun.

Ekki í lagi

Áberandi mikla rispur á stuðara. Skemmd má ekki ná í gegnum lakkið.

Rispur sem ná yfir stóran hluta og valda skemmdum á grunnefni stuðara.

Gler og ljósabúnaður

Í lagi

Högg vegna steinkasts eða rispur í gleri (ekki stærri en 10 mm), svo lengi sem það truflar eða hindrar ekki ökumann við akstur.

Högg eftir steinkast eða annað í ljósabúnað ökutækis eða rispur sem ekki hamla notkun búnaðarins.

Ekki í lagi

Sprunga eða brot í ljósabúnaði sem hindrar eðlilega virkni búnaðarins. Ljósaperur þurfa að vera heilar og í lagi. Ennfremur er brot eða sprunga í rúðu ökutækis (stærri en 10 mm) ekki í lagi.

Högg í ljósabúnað sem hefur valdið sprungu og broti í gleri, óháð stærð brots.

Hjólabúnaður og felgur

Í lagi

Mynstursdýpt á dekkjum sé í samræmi við kílómetrastöðu og dekk séu jafnslitin undir bílnum.

Smáar rispur eða hnoð á felgum.

Grunnar rispur á felgum, svo lengi sem beygla hefur ekki myndast á felgunni.

Felguboltar án alls ryðs og annarra skemmda.

Ekki í lagi

Dekkjaskemmdir vegna slæmrar meðferðar. Ójafnt slit dekkja er ekki í lagi.

Sprungur, bólgur eða skurðir á dekkjum eða aðrar skemmdir á hlið þeirra.

Beyglaðar eða brotnar felgur eða sprungur á felgum. Miklar rispur og brot í felgum.

Innra rými, loft og sæti

Í lagi

Eðlilegt slit á sætum, eins og við það að fara inn og út úr ökutæki.

Skyggni sem umgangur sést á, þ.e. það sem teljast má eðlileg notkun.

Smávægilegar litabreytingar sem eðlilegar mega teljast miðað við daglega notkun ökutækis.

Ekki í lagi

Umtalsvert slit og óhreinindi sem ekki er hægt að þrífa með góðu móti. Rifin bólstrun eða göt.

Mjög skítugt loft í ökutæki sem ekki er hægt að þrífa með hefðbundnum þrifum. Rispur, rákir, rifur, beyglur eða skurðir í efni eru ekki í lagi.

Leigutaka er óheimilt að reykja í ökutækinu. Á það einnig við um rafrettur.

Mælaborð, stýri, teppi og mottur

Í lagi

Það sem teljast má eðlilegt slit á teppi og mottum.

Notkun sést á stýri ökutækis, en einungis þannig að eðlilegt geti talist m.v. notkun.

Ekki í lagi

Rifur eða göt í teppi eða mottum.

Skemmdir á innra rými ökutækis sem ekki telst hluti af eðlilegri umgengni um ökutæki. Svo sem brot eða skemmdir á hlífum.

Bæklingur um not og slit

Hér er hægt að sækja PDF útgáfu af reglum um not og slit þar sem eru tilgreind þau viðmið sem notuð eru við mat á því sem telst eðlilegt og ekki eðlilegt þegar kemur að ástandi ökutækja þegar þeim er skilað að leigutíma loknum.

Sækja PDF